مکمل شاعری

جنہیں کہئے عشق کی وسعتیں جو ہیں خاص حسن کی عظمتیں

یہ اسی کے قلب سے پوچھئے جسے فخر ہو غم یار پر

کبھی شاخ و سبزہ و برگ پر کبھی غنچہ و گل و خار پر

میں چمن میں چاہے جہاں رہوں مرا حق ہے فصل بہار پر

مجھے دیں نہ غیظ میں دھمکیاں گریں لاکھ بار یہ بجلیاں

مری سلطنت یہ ہی آشیاں مری ملکیت یہ ہی چار پر

عجب انقلاب زمانہ ہے مرا مختصر سا فسانہ ہے

یہی اب جو بار ہے دوش پر یہی سر تھا زانوئے یار پر

مرے اشک خوں کی بہار ہے کہ مرقع غم یار ہے

مری شاعری بھی نثار ہے مری چشم سحر نگار پر

یہ کمال عشق کی سازشیں یہ جمال حسن کی نازشیں

یہ عنایتیں یہ نوازشیں مری ایک مشت غبار پر

مری سمت سے اسے اے صبا یہ پیام آخر غم سنا

ابھی دیکھنا ہو تو دیکھ جا کہ خزاں ہے اپنی بہار پر

میں رہین درد سہی مگر مجھے اور چاہئے کیا جگرؔ

غم یار ہے مرا شیفتہ میں فریفتہ غم یار پر

یہ فریب جلوہ ہے سر بسر مجھے ڈر یہ ہے دل بے خبر

کہیں جم نہ جائے تری نظر انہیں چند نقش و نگار پر

— جگر مراد آبادی