مکمل شاعری
ہم نے بھی وضع غم بدل ڈالی
جب سے وہ طرز التفات گئی
ترک الفت بہت بجا ناصح
لیکن اس تک اگر یہ بات گئی
ہاں یہ سرشاریاں جوانی کی
آنکھ جھپکی ہی تھی کہ رات گئی
اب جنوں آپ ہے گریباں گیر
اب وہ رسم تکلفات گئی
جلوۂ ذات اے معاذ اللہ
تاب آئینۂ صفات گئی
ہاں مزے لوٹ لے جوانی کے
پھر نہ آئے گی یہ جو رات گئی
قید ہستی سے کب نجات جگرؔ
موت آئی اگر حیات گئی
نہیں ملتا مزاج دل ہم سے
غالباً دور تک یہ بات گئی
دل دھڑکتے ہی پھر گئی وہ نظر
لب تک آئی نہ تھی کہ بات گئی
دن کا کیا ذکر تیرہ بختوں میں
ایک رات آئی ایک رات گئی
ان کے بہلائے بھی نہ بہلا دل
رائیگاں سعئ التفات گئی
تیری باتوں سے آج تو واعظ
وہ جو تھی خواہش نجات گئی
دل گیا رونق حیات گئی
غم گیا ساری کائنات گئی
مرگ عاشق تو کچھ نہیں لیکن
اک مسیحا نفس کی بات گئی
— جگر مراد آبادی