مکمل شاعری

اے حسن یار شرم یہ کیا انقلاب ہے

تجھ سے زیادہ درد ترا کامیاب ہے

اس سے دل تباہ کی روداد کیا کہوں

جو یہ نہ سن سکے کہ زمانہ خراب ہے

میری نگاہ شوق بھی کچھ کم نہیں مگر

پھر بھی ترا شباب ترا ہی شباب ہے

مانوس اعتبار کرم کیوں کیا مجھے

اب ہر خطائے شوق اسی کا جواب ہے

وہ لاکھ سامنے ہوں مگر اس کا کیا علاج

دل مانتا نہیں کہ نظر کامیاب ہے

تنہائی فراق کے قربان جائیے

میں ہوں خیال یار ہے چشم پر آب ہے

اے محتسب نہ پھینک مرے محتسب نہ پھینک

ظالم شراب ہے ارے ظالم شراب ہے

عاشق کی بے دلی کا تغافل نہیں جواب

اس کا بس ایک جوش محبت جواب ہے

اپنے حدود سے نہ بڑھے کوئی عشق میں

جو ذرہ جس جگہ ہے وہیں آفتاب ہے

میں اس کا آئینہ ہوں وہ ہے میرا آئینہ

میری نظر سے اس کی نظر کامیاب ہے

تیری عنایتیں کہ نہیں نذر جاں قبول

تیری نوازشیں کہ زمانہ خراب ہے

میں عشق بے نیاز ہوں تم حسن بے پناہ

میرا جواب ہے نہ تمہارا جواب ہے

مے خانہ ہے اسی کا یہ دنیا اسی کی ہے

جس تشنہ لب کے ہاتھ میں جام شراب ہے

اے حسن اپنی حوصلہ افزائیاں تو دیکھ

مانا کہ چشم شوق بہت بے حجاب ہے

سرمایۂ فراق جگرؔ آہ کچھ نہ پوچھ

اب جان ہے سو اپنے لیے خود عذاب ہے

— جگر مراد آبادی