مکمل شاعری

یوں تڑپ کر دل نے تڑپایا سر محفل مجھے

اس کو قاتل کہنے والے کہہ اٹھے قاتل مجھے

اب زباں بھی دے ادائے شکر کے قابل مجھے

درد بخشا ہے اگر تو نے بجائے دل مجھے

فکر منزل ہے نہ ہوش جادۂ منزل مجھے

جا رہا ہوں جس طرف لے جا رہا ہے دل مجھے

اب کدھر جاؤں بتا اے جذبۂ کامل مجھے

ہر طرف سے آج آتی ہے صدائے دل مجھے

جان دی کہ حشر تک میں ہوں مری تنہائیاں

ہاں مبارک فرصت نظارۂ قاتل مجھے

میں ازل سے صبح محشر تک فروزاں ہی رہا

حسن سمجھا تھا چراغ کشتۂ محفل مجھے

ہر اشارے پر ہے پھر بھی گردن تسلیم خم

جانتا ہوں صاف دھوکے دے رہا ہے دل مجھے

روک سکتی ہو تو بڑھ کر روک لے منزل مجھے

ہر طرف سے آج آتی ہے صدائے دل مجھے

کیسا قطرہ کیسا دریا کس کا طوفاں کس کی موج

تو جو چاہے تو ڈبو دے خشکئ ساحل مجھے

خون دل رگ رگ میں جم کر رہ گیا اس وہم سے

بڑھ کے سینے سے نہ لپٹا لے مرا قاتل مجھے

پھونک دے اے غیرت سوز محبت پھونک دے

اب سمجھتی ہیں وہ نظریں رحم کے قابل مجھے

توڑ کر بیٹھا ہوں راہ شوق میں پائے طلب

دیکھنا ہے جذبۂ بے تابئ منزل مجھے

جا بھی اے ناصح کہاں کا سود اور کیسا زیاں

عشق نے سمجھا دیا ہے عشق کا حاصل مجھے

درد محرومی سہی احساس ناکامی سہی

اس نے سمجھا تو بہر صورت کسی قابل مجھے

اے ہجوم ناامیدی شاد باش و زندہ باش

تو نے سب سے کر دیا بیگانہ و غافل مجھے

یہ بھی کیا منظر ہے بڑھتے ہیں نہ رکتے ہیں قدم

تک رہا ہوں دور سے منزل کو میں منزل مجھے

— جگر مراد آبادی