مکمل شاعری
ہائے وہ کیونکر دل بہلائے
غم بھی جس کو راس نہ آئے
جہل خرد نے دن یہ دکھائے
گھٹ گئے انساں بڑھ گئے سائے
کیسا مجاز اور کیسی حقیقت
اپنے ہی جلوے اپنے ہی سائے
کار زمانہ جتنا جتنا
بنتا جائے بگڑتا جائے
جھوٹی ہے ہر ایک مسرت
روح اگر تسکین نہ پائے
ضبط محبت شرط محبت
جی ہے کہ ظالم امڈا آئے
نغمہ وہی ہے نغمہ کہ جس کو
روح سنے اور روح سنائے
حسن وہی ہے حسن جو ظالم
ہاتھ لگائے ہاتھ نہ آئے
دل پہ کچھ ایسا وقت پڑا ہے
بھاگے لیکن راہ نہ پائے
راہ جنوں آسان ہوئی ہے
زلف و مژہ کے سائے سائے
ضد پر عشق اگر آ جائے
پانی چھڑکے آگ لگائے
— جگر مراد آبادی