مکمل شاعری

شب فراق ہے اور نیند آئی جاتی ہے

کچھ اس میں ان کی توجہ بھی پائی جاتی ہے

بنا بنا کے جو دنیا مٹائی جاتی ہے

ضرور کوئی کمی ہے کہ پائی جاتی ہے

کچھ ایسے بھی تو ہیں رندان پاک باز جگرؔ

کہ جن کو بے مئے و ساغر پلائی جاتی ہے

یہ عمر عشق یوں ہی کیا گنوائی جاتی ہے

حیات زندہ حقیقت بنائی جاتی ہے

خدا کرے کہ حقیقت میں زندگی بن جائے

وہ زندگی جو زباں تک ہی پائی جاتی ہے

ہمیں پہ عشق کی تہمت لگائی جاتی ہے

مگر یہ شرم جو چہرے پہ چھائی جاتی ہے

گناہ گار کے دل سے نہ بچ کے چل زاہد

یہیں کہیں تری جنت بھی پائی جاتی ہے

نہ سوز عشق نہ برق جمال پر الزام

دلوں میں آگ خوشی سے لگائی جاتی ہے

— جگر مراد آبادی