مکمل شاعری

جذبۂ شوق کامیاب ہوا

آج مجھ سے انہیں حجاب ہوا

اس کی نظروں میں انتخاب ہوا

دل عجب حسن سے خراب ہوا

نگۂ ناز لے خبر ورنہ

درد محبوب اضطراب ہوا

عشق کا سحر کامیاب ہوا

میں ترا تو مرا جواب ہوا

میں بنوں کس لیے نہ مست شراب

کیوں مجسم کوئی شباب ہوا

عین قربت بھی عین فرقت بھی

ہائے وہ قطرہ جو حباب ہوا

ہر نفس موج اضطراب ہوا

زندگی کیا ہوئی عذاب ہوا

دل کو چھونا نہ اے نسیم کرم

اب یہ دل روکش حباب ہوا

میری بربادیاں درست مگر

تو بتا کیا تجھے ثواب ہوا

مستیاں ہر طرف ہیں آوارہ

کون غارت گر شراب ہوا

عشق بے امتیاز کے ہاتھوں

حسن خود بھی شکست یاب ہوا

دل کی ہر چیز جگمگا اٹھی

آج شاید وہ بے نقاب ہوا

جب وہ آئے تو پیشتر سب سے

میری آنکھوں کو اذن خواب ہوا

دور ہنگامۂ نشاط نہ پوچھ

اب وہ سب کچھ خیال و خواب ہوا

تو نے جس اشک پر نظر ڈالی

جوش کھا کر وہی شراب ہوا

ستم خاص یار کی ہے قسم

کرم یار بے حساب ہوا

— جگر مراد آبادی