مکمل شاعری

احساس عاشقی نے بیگانہ کر دیا ہے

یوں بھی کسی نے اکثر دیوانہ کر دیا ہے

اب کیا امید رکھوں اے حسن یار تجھ سے

تو نے تو مسکرا کر دیوانہ کر دیا ہے

پھر اس کے دیکھنے کو آنکھیں ترس رہی ہیں

یادش بخیر جس نے دیوانہ کر دیا ہے

مجھ کو جنوں سے اپنے شکوہ جو ہے تو یہ ہے

میری محبتوں کو افسانہ کر دیا ہے

جب دل میں آ گیا ہے اک جنبش نظر نے

دیوانہ کہہ دیا ہے دیوانہ کر دیا ہے

اے حسن روز افزوں عمرت دراز باد

دونوں جہاں سے مجھ کو بیگانہ کر دیا ہے

مجھ سے ہی پوچھتے ہیں یہ شوخیاں تو دیکھو

میرے جگرؔ کو کس نے دیوانہ کر دیا ہے

تجھ سے خدا ہی سمجھے تو نے کسی کو اے دل

مجھ سے بھی کچھ زیادہ دیوانہ کر دیا ہے

— جگر مراد آبادی