مکمل شاعری

طبیعت اس طرف خوددار بھی ہے

ادھر نازک مزاج یار بھی ہے

محبت صلح بھی پیکار بھی ہے

یہ شاخ گل بھی ہے تلوار بھی ہے

یہ فتنے جن سے اک دنیا ہے نالاں

انہیں سے گرمئ بازار بھی ہے

ادائے عشق ادائے یار بھی ہے

بہت سادہ بہت پرکار بھی ہے

جنوں کے دم سے ہے نظم دو عالم

جنوں برہم زن افکار بھی ہے

اسی انسان میں سب کچھ ہے پنہاں

مگر یہ معرفت دشوار بھی ہے

نفس پر ہے مدار زندگانی

نفس چلتی ہوئی تلوار بھی ہے

وہ بوئے گل کہ ہے جان چمن بھی

قیامت ہے چمن بے زار بھی ہے

یہی دنیا ہے نسبت آنسوؤں کی

یہی دنیا تبسم زار بھی ہے

خبردار اے سبک ساران ساحل

یہ ساحل ہی کبھی منجدھار بھی ہے

جہاں وہ ہیں وہیں میرا تصور

جہاں میں ہوں خیال یار بھی ہے

غنیمت ہے کہ اس دور ہوس میں

ترا ملنا بہت دشوار بھی ہے

ان آنکھوں کی زہے معجز بیانی

بہم انکار بھی اقرار بھی ہے

جو کوئی سن سکے تو نکہت گل

شکست رنگ کی جھنکار بھی ہے

— جگر مراد آبادی