مکمل شاعری

اللہ رے اس گلشن ایجاد کا عالم

جو صید کا عالم وہی صیاد کا عالم

پہروں سے دھڑکنے کی بھی آتی نہیں آواز

کیا جانئے کیا ہے دل ناشاد کا عالم

کیا جانیے کیا ہے مری معراج مقامی

عالم تو ہے صرف اک مری افتاد کا عالم

منصور تو سر دے کے سبک ہو گیا لیکن

جلاد سے پوچھے کوئی جلاد کا عالم

اف رنگ رخ بانی بیداد کا عالم

جیسے کسی مظلوم کی فریاد کا عالم

میں اور ترے ہجر مسلسل کی شکایت

تیرا ہی تو عالم ہے تیری یاد کا عالم

ارباب چمن سے نہیں پوچھو یہ چمن سے

کہتے ہیں کسے نکہت برباد کا عالم

کیوں آتش گل میرے نشیمن کو جلائے

تنکوں میں ہے خود برق چمن زاد کا عالم

— جگر مراد آبادی