مکمل شاعری

جستجو میں تری یہ حاصل سودا دیکھا

ایک اک ذرہ کا آغوش طلب وا دیکھا

ہر حقیقت کو بانداز تماشا دیکھا

خوب دیکھا ترے جلووں کو مگر کیا دیکھا

ہم نے ایسا نہ کوئی دیکھنے والا دیکھا

جو یہ کہہ دے کہ ترا حسن سراپا دیکھا

آئینہ خانۂ عالم میں کہیں کیا دیکھا

تیرے دھوکے میں خود اپنا ہی تماشا دیکھا

کوئی شائستہ و شایان غم دل نہ ملا

ہم نے جس بزم میں دیکھا اسے تنہا دیکھا

دل آگاہ میں کیا کہیے جگرؔ کیا دیکھا

لہریں لیتا ہوا اک قطرے میں دریا دیکھا

— جگر مراد آبادی