مکمل شاعری

محبت دونوں جانب مہرباں ہے

کہ ہم اس سے وہ ہم سے بد گماں ہے

اگر تو ہے تو اے جان دو عالم

یہاں ہر شے جواں جاوداں ہے

ترے نقش قدم کا ذرہ ذرہ

عبادت گاہ جان عاشقاں ہے

الٰہی خیر کرنا دیر سے پھر

بہت مضطر نگاہ رازداں ہے

پھنکا جاتا ہے دل جس سوز غم سے

جہنم میں یہ چنگاری کہاں ہے

جو پڑھ سکتا ہے تو پڑھ اے غم دل

کہ ان نظروں میں آج اک داستاں ہے

محبت آپ اپنی ترجماں ہے

یہی خود چشم و دل لفظ و بیاں ہے

وہ کب سے مضطرب ہیں اے غم عشق

خدا جانے تیری غیرت کہاں ہے

کسی کو اک نظر ہی دیکھ تو لیں

اب اتنی بھی ہمیں جرأت کہاں ہے

نگاہوں میں بہار جاوداں ہے

جہاں میں ہوں وہیں اب آشیاں ہے

مزے سوز دروں کے مل رہے ہیں

بحمد للہ کہ دل آتش بجاں ہے

تماشا دیدنی ہے دیکھ جاؤ

زبان شوق و گلبانگ فغاں ہے

کوئی آواز ہی دے گمشدہ دل

کہاں ہے او مرے یوسف کہاں ہے

مبارک باد اے جذب محبت

انہیں اپنے پر اب میرا گماں ہے

ہماری رفعتوں کا پوچھنا کیا

جہاں ہم پاؤں رکھ دیں آسماں ہے

— جگر مراد آبادی