مکمل شاعری

حسن کے احترام نے مارا

عشق بے ننگ و نام نے مارا

لرزش دست شوق آہ نہ پوچھ

لغزش نیم گام نے مارا

وعدۂ ناتمام نے مارا

روز کی صبح و شام نے مارا

کاش وہ عمر خضر بن جائے

جن خیالات خام نے مارا

عشق کی سادگی تو ایک طرف

شوق کے اہتمام نے مارا

میں نہیں بسمل خیام جگرؔ

حافظ خوش کلام نے مارا

عشق مرتا نہ اپنی موت سے آہ

عاشقان کرام نے مارا

اللہ اللہ نفس کی آمد و شد

اس پیام و سلام نے مارا

— جگر مراد آبادی