مکمل شاعری
عرق آلود چہرۂ تاباں
شبنم و آفتاب کا عالم
حسن کافر شباب کا عالم
سر سے پا تک شراب کا عالم
وہ مری عرض شوق بے حد پر
کچھ حیا کچھ عتاب کا عالم
اللہ اللہ وہ امتزاج لطیف
شوخیوں میں حجاب کا عالم
زانوئے شوق پر وہ پچھلے پہر
نرگس نیم خواب کا عالم
ہمہ نور و سرور کی دنیا
ہمہ حسن و شباب کا عالم
دیر تک اختلاط راز و نیاز
یک بیک اجتناب کا عالم
وہ لب جوئبار و موسم گل
وہ شب ماہتاب کا عالم
وہ سماں آج بھی ہے یاد جگرؔ
ہاں مگر جیسے خواب کا عالم
غم کی ہر موج موج طوفاں خیز
دل کا عالم حباب کا عالم
لاکھ رنگیں بیانیوں پہ مری
ایک سادہ جواب کا عالم
دل مطرب سمجھ سکے شاید
اک شکستہ رباب کا عالم
— جگر مراد آبادی