مکمل شاعری
عرق آلود چہرۂ تاباں
شبنم و آفتاب کا عالم
وہ مری عرض شوق بے حد پر
کچھ حیا کچھ عتاب کا عالم
حسن کافر شباب کا عالم
سر سے پا تک شراب کا عالم
ہمہ نور و سرور کی دنیا
ہمہ حسن و شباب کا عالم
دیر تک اختلاط راز و نیاز
یک بیک اجتناب کا عالم
وہ لب جوئبار و موسم گل
وہ شب ماہتاب کا عالم
زانوئے شوق پر وہ پچھلے پہر
نرگس نیم خواب کا عالم
دل مطرب سمجھ سکے شاید
اک شکستہ رباب کا عالم
غم کی ہر موج موج طوفاں خیز
دل کا عالم حباب کا عالم
لاکھ رنگیں بیانیوں پہ مری
ایک سادہ جواب کا عالم
وہ سماں آج بھی ہے یاد جگرؔ
ہاں مگر جیسے خواب کا عالم
اللہ اللہ وہ امتزاج لطیف
شوخیوں میں حجاب کا عالم
— جگر مراد آبادی