مکمل شاعری

رنگینیٔ بہار کا اللہ رے فسوں

ساز دل شکستہ غزل خواں ہے آج کل

پھر نغمہ ریز ابر بہاراں ہے آج کل

پھر چاک دل بقدر گریباں ہے آج کل

وہ سجدہ جو بہائے دو عالم سے ہے گراں

میری جبین شوق میں غلطاں ہے آج کل

یہ ابر یہ ہوا یہ برستی ہوئی شراب

کافر ہے سخت وہ جو مسلماں ہے آج کل

پہلے بھی عطر بیز نسیم بہار تھی

کس کی شمیم زلف پریشاں ہے آج کل

ژولیدگی نہ پوچھ فضاؤں میں ہم نشیں

خوشبوئے زلف دوست پریشاں ہے آج کل

پھر میں ہوں اور محفل جاناں کی آرزو

پھر مہرباں سیاست درباں ہے آج کل

ساقی نے وا کیا در مے خانۂ حیات

فطرت کی چشم مہر پشیماں ہے آج کل

میں اور دور ساغر و مینا ہے ان دنوں

آنکھیں ہیں اور تصور جاناں ہے آج کل

ہر جلوہ حیات بقدر نشاط و رنگ

منت کش تبسم جاناں ہے آج کل

اے روح درد و شاد یہ تیرا ہی فیض ہے

جوہرؔ جو اس ادا سے غزل خواں ہے آج کل

بھاتی نہیں ہے دل کو کسی ساز کی صدا

نغموں کا ہر نفس میں وہ طوفاں ہے آج کل

— جوہر نظامی