مکمل شاعری
کس سے بار غم اٹھا کس نے کسے رسوا رکھا
بھول جا یہ گزری باتیں ہیں اب ان میں کیا رکھا
ایک ایسا آدمی اس شہر میں موجود ہے
موت کے ڈر کے سوا جس نے مجھے زندہ رکھا
صرف جھوٹھے اعتراف جرم میں ہے بہتری
اب کے اس نے میرے سر الزام ہی ایسا رکھا
مر گئے لیکن ترے آنے کی امیدیں رکھیں
بجھ گئے لیکن چراغ آرزو جلتا رکھا
جانے وہ جھونکا کدھر سے آیا تھا جس نے جمالؔ
حبس کے عالم میں بھی جی کو تر و تازہ رکھا
— جمال احسانی