مکمل شاعری

خدا ہی آپ نہ جب تک زمیں پہ اترے گا

تو کون پورا کسی کے یقیں پہ اترے گا

یہ سیل اشک بھی اپنا ہے آنکھ بھی اپنی

کھڑے رہو کہ یہ دریا یہیں پہ اترے گا

بھروسہ کوئی نہیں ہے کسی مسافر کا

جہاں بھی ریل رکے گی وہیں پہ اترے گا

چلے تو ہو سفر عشق پر خیال رہے

کہیں چڑھے گا یہ دریا کہیں پہ اترے گا

تمام خاک نشیں زیر خاک ہوں گے مگر

لہو کا رنگ تری آستیں پہ اترے گا

یہاں بھرے ہوئے بیٹھے ہیں سب بندھے ہاتھوں

سو اب یہ غصہ ترے جانشیں پہ اترے گا

جمالؔ خطۂ دل ہو بھی جائے گر ہموار

کوئی جہاز نہ اس سرزمیں پہ اترے گا

— جمال احسانی