مکمل شاعری

نشے کی لہر طاری ہو رہی ہے

مری آواز بھاری ہو رہی ہے

رقیبوں پر عنایت برسر بزم

بہت خاطر ہماری ہو رہی ہے

سبھی میرے مرض کو کوستے ہیں

یہ کیا تیمار داری ہو رہی ہے

چمن کا راستہ مت گھیر کے بیٹھ

خفا باد بہاری ہو رہی ہے

سب اپنے اپنے گھر میں مطمئن ہیں

مجھے کیوں بے قراری ہو رہی ہے

گلی کے ایک گھر میں عید کے روز

یہ کیسی آہ و زاری ہو رہی ہے

سنا ہے اس گلی سے عاشقوں کی

نئی فہرست جاری ہو رہی ہے

جو آئے پوچھتا ہے عمر میری

عجب تیمارداری ہو رہی ہے

مرے پہلو میں وہ ہے اور مجھ پر

عجب وحشت سی طاری ہو رہی ہے

— جمال احسانی