مکمل شاعری
آج تو گھر میں کوئی نہیں ہے آج تو کھل کے رو لیں گے
رو رو کر تھک جائیں گے تو پل دو پل کو سو لیں گے
کب تک ہم مشہور رہیں گے نیک اطوار و نیک خصال
کب تک یہ دیوار و در بھی آخر بھید نہ کھولیں گے
ہر دیوار گرا دیں گے گر اپنی جان میں جان رہی
ہاتھ اور پیر سلامت ہیں تو سارے پتھر ڈھو لیں گے
کھیتوں سے بادل تک اک برسات کا فاصلہ حائل ہے
یعنی جب تک فصل کٹے گی ہم تو بوڑھے ہو لیں گے
روکھی سوکھی کھا لیتے ہیں اس امید کے ساتھ جمالؔ
بارش ہو جائے تو ہم بھی اپنی روٹی بھگو لیں گے
— جمال احسانی