مکمل شاعری

ہمیں یہ کیسی تصویریں دکھائی جا رہی ہیں

گھروں کے صحن میں قبریں بنائی جا رہی ہیں

پرند اور پیڑ کیوں چلا رہے ہیں پانی پانی

گھٹائیں آسماں میں کیوں سمائی جا رہی ہیں

مرے پھولوں کو انگاروں میں تولا جا رہا ہے

مری گلیاں شراروں میں نہائی جا رہی ہیں

مرے گھر کو عقوبت گاہ میں تبدیل کر کے

مرے خوابوں کو زنجیریں لگائی جا رہی ہیں

چراغ اب تک نہیں جس گھر کے طاقوں کو میسر

وہاں مانگے کی پھلجڑیاں جلائی جا رہی ہیں

— عشرت آفریں