مکمل شاعری

کسم کے پھول مرے گھر میں وہ لگا ہی گیا

یہ رنگ میرے دوپٹے کو راس آ ہی گیا

تمام عمر جو زخموں پہ ہاتھ رکھتا رہا

ذرا سی بات پہ وہ دل مرا دکھا ہی گیا

وہ اتنی ساری نگاہوں کی بھیڑ سے بچ کر

میں جب اداس ہوئی میرے پاس آ ہی گیا

ذرا سا صبر جو آیا تھا وحشت دل کو

وہ جاتے جاتے پھر اک حشر سا اٹھا ہی گیا

اب ایک رشتۂ بے نام سے اسے پوجوں

کہ پور پور وہ پتھر مجھے بنا ہی گیا

میں گل بدست تھی اور سارا شہر سنگ بدست

بھلا ہوا مری بستی سے وہ چلا ہی گیا

— عشرت آفریں