مکمل شاعری

ہاتھ میرے ہیں نہ پتھر میرے

سر ہے کس واسطے آذر میرے

فصل گل ہو گئی مفلس ایسی

خالی ہاتھ آئی ہے یہ گھر میرے

اب کے برسات میں ایسی ٹوٹی

تتلیاں لے کے اڑیں پر میرے

بھیگتی رات کے سائے سائے

آج تم آئے نہیں گھر میرے

لاکھ پتھر ہوں مگر لڑکی ہوں

پھول ہی پھول ہیں اندر میرے

میں ہوں انجیل وفا کی تنزیل

اے محبت کے پیمبر میرے

میں ہوں سچائی کے دو راہے پر

کوئی پہنچائے مجھے گھر میرے

آ کہ ان آنکھوں کے حصے کر لیں

سیپیاں تیری ہوں گہر میرے

— عشرت آفریں