مکمل شاعری
وہ حرف تھا نہ ستارہ مگر چمکتا تھا
کہ میرے زرد گلابوں کے بیچ مہکا تھا
وہ آنکھ سچ تھی مگر اعتبار آئینہ
مری نظر میں تو ہر عکس ریزہ ریزہ تھا
وہ روشنی کہ جسے حدتوں سے کام نہ تھا
وہ آئنہ کہ جو سورج کے رخ پہ رکھا تھا
وہ صحن جس میں تری یاد کے پرند اترے
وہ شاخ جس پہ مرے خواب کا بسیرا تھا
اسی کو موسم باراں کی چاہ تھی کیا کیا
وہ ایک شاخ جسے بھیگ کر سلگنا تھا
یہ اور بات کہ کم حوصلہ تو میں بھی تھی
مگر یہ سچ ہے اسے پہلے میں نے چاہا تھا
نہ میرے ہاتھ حنائی نہ اس کے خواب گلاب
تو پھر یہ رنگ سا پیراہنوں پہ کیسا تھا
— عشرت آفریں