مکمل شاعری

دیدنی ہیں دل خراب کے رنگ

آہ اس چشم پرحجاب کے رنگ

خیل خوباں سے ایک میں بھی نہیں

آپ کے حسن لاجواب کے رنگ

نہیں توبہ کی خیر ہیں جو یہی

جوش ہنگامۂ سحاب کے رنگ

فصل گل میں پڑیں تو خوب کھلیں

خرقۂ زہد پر شراب کے رنگ

کل کے مقبول آج ہیں مردود

آہ اس دور انقلاب کے رنگ

قابل دید ہیں وصال کی شب

آرزو ہائے کامیاب کے رنگ

شوق مے دل میں لب پہ ہجو شراب

ہم پہ روشن ہیں سب جناب کے رنگ

چہرۂ عاشقی ہے پژمردہ

کیا ہوئے وہ مئے شباب کے رنگ

میری مایوسیوں سے ہیں پیدا

کشمکش ہائے اضطراب کے رنگ

دل کے ہاتھوں بہت رہے ہیں خراب

حسرتؔ خانماں خراب کے رنگ

— حسرتؔ موہانی