مکمل شاعری

مٹا دے خود ہمیں گر شکوۂ غم مٹ نہیں سکتا

جفائے یار سے یہ آخری اپنی گزارش ہے

پے مشق تغافل آپ نے مخصوص ٹھہرایا

ہمیں یہ بات بھی منجملۂ اسباب نازش ہے

کہاں ممکن کسی کو باریابی ان کی محفل میں

نہ اطمینان کوشش ہے نہ امید سفارش ہے

مقرر کچھ نہ کچھ اس میں رقیبوں کی بھی سازش ہے

وہ بے پروا الٰہی مجھ پہ کیوں گرم نوازش ہے

نہاں ہے دل پذیری جس کے ہر ہر لفظ شیریں میں

یہ کس جان وفا کے ہاتھ کی رنگیں نگارش ہے

کیا تھا ایک دن دل نے جو دعوئے شکیبائی

سو اب تک ان کے ناز دلبری کو ہم سے کاوش ہے

ہجوم یاس نے بیدل کیا ایسا کہ حسرتؔ کو

ترے آنے کی اب امید باقی ہے نہ خواہش ہے

— حسرتؔ موہانی