مکمل شاعری
بت بے درد کا غم مونس ہجراں نکلا
درد جانا تھا جسے ہم نے وہ درماں نکلا
حسرت و یاس کا انبوہ فغاں کی کثرت
میں تری بزم سے کیا با سر و ساماں نکلا
خون ہو کر تو یہ دل آنکھ سے برسوں ٹپکا
نہ کوئی پر دل ناکام کا ارماں نکلا
آئنہ پیکر تصویر نگاہ مشتاق
جسے دیکھا تری محفل میں وہ حیراں نکلا
خوب دوزخ کی مصیبت سے بچے ہم حسرتؔ
اس کا داروغہ وہی یار کا درباں نکلا
مجھ کو حیرت ہے ہوا کیا دم رخصت ہمدم
جان نکلی مرے پہلو سے کہ جاناں نکلا
آنکھ جب بند ہوئی تب کھلیں آنکھیں اپنی
بزم یاراں جسے سمجھے تھے وہ زنداں نکلا
— حسرتؔ موہانی