مکمل شاعری
آسان حقیقی ہے نہ کچھ سہل مجازی
معلوم ہوئی راہ محبت کی درازی
کچھ لطف و نظر لازم و ملزوم نہیں ہیں
اک یہ بھی تمنا کی نہ ہو شعبدہ بازی
قائم ہے نہ وہ حسن رخ یار کا عالم
باقی ہے نہ وہ شوق کی ہنگامہ نوازی
معلوم ہے دنیا کو یہ حسرتؔ کی حقیقت
خلوت میں وہ مے خوار ہے جلوت میں نمازی
اے عشق تری فتح بہرحال ہے ثابت
مر کر بھی شہیدان محبت ہوئے غازی
کر جلد ہمیں ختم کہیں اے غم جاناں
کام آئے گی کس روز تری سینہ گدازی
دل خوب سمجھتا ہے ترے حرف کرم کو
ہر چند وہ اردو ہے نہ ترکی ہے نہ تازی
— حسرتؔ موہانی