مکمل شاعری
قسمت شوق آزما نہ سکے
ان سے ہم آنکھ بھی ملا نہ سکے
ہم سے دل آپ نے اٹھا تو لیا
پر کہیں اور بھی لگا نہ سکے
دل میں کیا کیا تھے عرض حال کے شوق
اس نے پوچھا تو کچھ بتا نہ سکے
ہم سے یاں رنج ہجر اٹھ نہ سکا
واں وہ مجبور تھے وہ آ نہ سکے
اب کہاں تم کہاں وہ ربط وفا
یاد بھی جس کی ہم دلا نہ سکے
ڈر یہ تھا رو نہ دیں کہیں وہ انہیں
ہم ہنسی میں بھی گدگدا نہ سکے
ہم تو کیا بھولتے انہیں حسرتؔ
دل سے وہ بھی ہمیں بھلا نہ سکے
— حسرتؔ موہانی