مکمل شاعری

درد دل کی انہیں خبر نہ ہوئی

کوئی تدبیر کارگر نہ ہوئی

نارسا آہ عاشقاں وہ کہاں

دور ان سے جو بے اثر نہ ہوئی

کر چکے ہم کو بے گناہ شہید

آپ کی آنکھ پھر بھی تر نہ ہوئی

شب تھے ہم گرم نالہ ہائے فراق

صبح اک آہ سرد سر نہ ہوئی

کوششیں ہم نے کیں ہزار مگر

عشق میں ایک معتبر نہ ہوئی

تم سے کیونکر وہ چھپ سکے حسرتؔ

نگہ شوق پردہ در نہ ہوئی

آئی بجھنے کو اپنی شمع حیات

شب غم کی مگر سحر نہ ہوئی

— حسرتؔ موہانی