مکمل شاعری

روشن جمال یار سے ہے انجمن تمام

دہکا ہوا ہے آتش گل سے چمن تمام

نشو و نمائے سبزہ و گل سے بہار میں

شادابیوں نے گھیر لیا ہے چمن تمام

اس نازنیں نے جب سے کیا ہے وہاں قیام

گلزار بن گئی ہے زمین دکن تمام

اللہ ری جسم یار کی خوبی کہ خودبخود

رنگینیوں میں ڈوب گیا پیرہن تمام

حیرت غرور حسن سے شوخی سے اضطراب

دل نے بھی تیرے سیکھ لیے ہیں چلن تمام

دل خون ہو چکا ہے جگر ہو چکا ہے خاک

باقی ہوں میں مجھے بھی کر اے تیغ زن تمام

ہے ناز حسن سے جو فروزاں جبین یار

لبریز آب نور ہے چاہ ذقن تمام

دیکھو تو چشم یار کی جادو نگاہیاں

بے ہوش اک نظر میں ہوئی انجمن تمام

اچھا ہے اہل جور کیے جائیں سختیاں

پھیلے گی یوں ہی شورش حب وطن تمام

شیرینئ نسیم ہے سوز و گداز میرؔ

حسرتؔ ترے سخن پہ ہے لطف سخن تمام

سمجھے ہیں اہل شرق کو شاید قریب مرگ

مغرب کے یوں ہیں جمع یہ زاغ و زغن تمام

— حسرتؔ موہانی