مکمل شاعری
ہم تو انسان ہیں اے خضر ہمیں مرنا ہے
جینے دیتا نہیں فطرت کا تقاضا ہم کو
شیخ کا خوف ہمیں حشر کا دھڑکا ہم کو
ساتھ ہی عشق کے آزار نے مارا ہم کو
ہے ابھی دور بہت دور ہماری منزل
حکم ہے فرش سے تا عرش معلیٰ ہم کو
وہ نگہ باندھ گئی دل میں طلسم امید
نظر آتی ہے تمنا ہی تمنا ہم کو
موت کہتے ہیں جسے ضبط کا یہ خبط نہ ہو
زندگی پر بھی ہے فریاد کا دھوکا ہم کو
شہر الفت میں نہیں تفرقہ پرداز حفیظؔ
کہیں کعبہ نظر آیا نہ کلیسا ہم کو
جاؤ ہاں جاؤ رقیبوں کی مرادیں بر لاؤ
رہنے دو رہنے دو ناکام تمنا ہم کو
— حفیظ جالندھری