مکمل شاعری

تیر چلے پہ نہ آنا کہ خطا ہو جانا

لب تک آتے ہوئے شکوے کا دعا ہو جانا

داور حشر کا انصاف اشارے ان کے

بس یہی ہے کسی بندے کا خدا ہو جانا

اس کی افتاد پہ خورشید کی رفعت قرباں

جس کو بھایا ترا نقش کف پا ہو جانا

رونق بزم ہے شیون سے تو شیون ہی سہی

ہم صفیران چمن پھر نہ خفا ہو جانا

دست تقدیر میں شمشیر جفا دینا ہے

خود بہ خود بندۂ تسلیم و رضا ہو جانا

حیرت انگیز ہے نقاش ازل کے ہاتھوں

میری تصویر کا تصویر فنا ہو جانا

یاد ہے اس بت کافر کا خفا ہو جانا

اور مرا بھول کے مائل بہ دعا ہو جانا

— حفیظ جالندھری