مکمل شاعری

جلوۂ حسن کو محروم تماشائی کر

بے نیازی صفت لالۂ صحرائی کر

میں تو مجبور ہوں عادت سے کہے جاؤں گا

تو کوئی بات نہ سن اور نہ پذیرائی کر

ہم تری صورت انکار کو پہچانتے ہیں

وہ تبسم تو شریک لب گویائی کر

ہاں بڑے شوق سے شمشیر کے اعجاز دکھا

ہاں بڑے شوق سے دعوائے مسیحائی کر

اپنے بیمار کی یہ آخری امید بھی دیکھ

ملک الموت سے کہتا ہے مسیحائی کر

مجھ کو لے جا کے در یار پہ قاصد نے کہا

خامہ فرسائی نہ کر ناصیہ فرسائی کر

— حفیظ جالندھری