مکمل شاعری
امید نے بھی یاس کے مردوں کو پکارا
آئی کوئی آواز نہ دل سے نہ جگر سے
خورشید قیامت کی ادا دیکھ رہا ہوں
ملتی ہوئی صورت ہے مرے داغ جگر سے
وہ ابر جو مے خوار کی تربت پہ نہ برسے
کہہ دو کہ خدارا کبھی گزرے نہ ادھر سے
خطرے میں ہیں کچھ دن سے حفیظؔ اہل دو عالم
ہر شب مرے نالوں کی لڑائی ہے اثر سے
ناصح کو بلاؤ مرا ایمان سنبھالے
پھر دیکھ لیا اس نے اسی ایک نظر سے
ایک ایک قدم پر ہے جہاں خندۂ تقدیر
تدبیر گزرتی ہے اسی راہ گزر سے
اتنا تو ہوا آہ شب غم کے اثر سے
فطرت کا جگر پھوٹ بہا چشم سحر سے
کچھ شان کریمی نے اس انداز سے تولا
بھاری ہی رہا دیدۂ تر دامن تر سے
اے خندۂ گلشن یہ ہے انجام شب عیش
گل روتے ہیں نہ منہ ڈھانپ کے دامان سحر سے
— حفیظ جالندھری