مکمل شاعری

نہ کر دل جوئی اے صیاد میری

کہ فطرت ہے بہت آزاد میری

قضا کا ظلم حد سے بڑھ گیا ہے

کوئی سنتا نہیں فریاد میری

مرے اشعار پر چپ رہنے والے

ترے حصے میں آئی داد میری

خداوندا قضا نے چھین لی ہے

مرے آغوش سے ارشادؔ میری

سہارا کیوں لیا تھا ناخدا کا

خدا بھی کیوں کرے امداد میری

فرشتے کیا مرتب کر سکیں گے

بہت بے ربط ہے روداد میری

کیا پابند نے نالے کو میں نے

یہ طرز خاص ہے ایجاد میری

بھلا دو مجھ کو لیکن یاد رکھنا

ستائے گی تمہیں بھی یاد میری

پسند آنے لگی تھی سر بلندی

یہی تھی اولیں افتاد میری

اسیری سے رہائی پانے والو

تمہیں پہنچے مبارک باد میری

— حفیظ جالندھری