مکمل شاعری

میں وہ بستی ہوں کہ یاد رفتگاں کے بھیس میں

دیکھنے آتی ہے اب میری ہی ویرانی مجھے

ہے ازل کی اس غلط بخشی پہ حیرانی مجھے

عشق لافانی ملا ہے زندگی فانی مجھے

تھی یہی تمہید میرے ماتمی انجام کی

پھول ہنستے ہیں تو ہوتی ہے پشیمانی مجھے

باندھ کر روز ازل شیرازۂ مرگ و حیات

سونپ دی گویا دو عالم کی پریشانی مجھے

حسن بے پردہ ہوا جاتا ہے یا رب کیا کروں

اب تو کرنی ہی پڑی دل کی نگہبانی مجھے

پوچھتا پھرتا تھا داناؤں سے الفت کے رموز

یاد اب رہ رہ کے آتی ہے وہ نادانی مجھے

— حفیظ جالندھری