مکمل شاعری
خضر کا ساتھ دیے جا قدم بڑھائے جا
فریب کھائے ہوئے کا فریب کھائے جا
شراب خم سے دیے جا نشہ تبسم سے
کبھی نظر سے کبھی جام سے پلائے جا
تری نظر میں ستارے ہیں اے مرے پیارے
اڑائے جا تہ افلاک خاک اڑائے جا
کبھی زمیں پہ کبھی آسماں پہ چھائے جا
اجاڑنے کے لیے بستیاں بسائے جا
نہیں عتاب زمانہ خطاب کے قابل
ترا جواب یہی ہے کہ مسکرائے جا
اناڑیوں سے تجھے کھیلنا پڑا اے دوست
سجھا سجھا کے نئی چال مات کھائے جا
— حفیظ جالندھری