مکمل شاعری
اب تو کچھ اور بھی اندھیرا ہے
یہ مری رات کا سویرا ہے
رہزنوں سے تو بھاگ نکلا تھا
اب مجھے رہبروں نے گھیرا ہے
قافلہ کس کی پیروی میں چلے
کون سب سے بڑا لٹیرا ہے
آگے آگے چلو تبر والو
ابھی جنگل بہت گھنیرا ہے
سر پہ راہی کے سربراہی نے
کیا صفائی کا ہاتھ پھیرا ہے
اے مری جان اپنے جی کے سوا
کون تیرا ہے کون میرا ہے
سرمہ آلود خشک آنسوؤں نے
نور جاں خاک پر بکھیرا ہے
سو رہو اب حفیظؔ جی تم بھی
یہ نئی زندگی کا ڈیرا ہے
راکھ راکھ استخواں سفید سفید
یہی منزل یہی بسیرا ہے
— حفیظ جالندھری