مکمل شاعری

عرض ہنر بھی وجہ شکایات ہو گئی

چھوٹا سا منہ تھا مجھ سے بڑی بات ہو گئی

دیکھا جو کھا کے تیر کمیں گاہ کی طرف

اپنے ہی دوستوں سے ملاقات ہو گئی

دشنام کا جواب نہ سوجھا بجز سلام

ظاہر مرے کلام کی اوقات ہو گئی

وہ خوش نصیب تم سے ملاقات کیوں کرے

دربان ہی سے جس کی مدارات ہو گئی

یاروں کی برہمی پہ ہنسی آ گئی حفیظؔ

یہ مجھ سے ایک اور بری بات ہو گئی

ہر ایک رہنما سے بچھڑنا پڑا مجھے

ہر موڑ پر کوئی نہ کوئی گھات ہو گئی

یاران بے بساط کہ ہر بازئ حیات

کھیلے بغیر ہار گئے مات ہو گئی

یا ضربت خلیل سے بت خانہ چیخ اٹھا

یا پتھروں کو معرفت ذات ہو گئی

بے رزم دن گزار لیا رتجگا مناؤ

اے اہل بزم جاگ اٹھو رات ہو گئی

اب شکر ناقبول ہے شکوہ فضول ہے

جیسے بھی ہو گئی بسر اوقات ہو گئی

حد عمل میں تھی تو عمل تھی یہی شراب

رد عمل بنی تو مکافات ہو گئی

نکلے جو میکدے سے تو مسجد تھا ہر مقام

ہر گام پر تلافئ مافات ہو گئی

— حفیظ جالندھری