مکمل شاعری
آخر ایک دن شاد کرو گے
میرا گھر آباد کرو گے
پیار کی باتیں وصل کی راتیں
یاد کرو گے یاد کرو گے
کس دل سے آباد کیا تھا
کس دل سے برباد کرو گے
جب مجھ کو چپ لگ جائے گی
پھر تم بھی فریاد کرو گے
میں نے اپنی قیمت کہہ دی
تم بھی کچھ ارشاد کرو گے
زر کے بندو عقل کے اندھو
تم کیا مجھ کو شاد کرو گے
اور تمہیں آتا ہی کیا ہے
کوئی ستم ایجاد کرو گے
تنگ آ کر اے بندہ پرور
بندے کو آزاد کرو گے
حسن کو رسوا کر کے مروں گا
آخر تم کیا یاد کرو گے
میرے دل میں بسنے والو
تم مجھ کو برباد کرو گے
حشر کے دن امید ہے ناصح
تم میری امداد کرو گے
— حفیظ جالندھری