مکمل شاعری

وہی میں ہوں وہی ہے تیرے غم کی کار فرمائی

کبھی تنہائی میں محفل کبھی محفل میں تنہائی

من و تو کا حجاب اٹھنے نہ دے اے جان یکتائی

کہیں ایسا نہ ہو بن جاؤں خود اپنا تمنائی

خلش انگیز ہے وہ عالم جذب و گریز اب تک

تری اچھی بری ہر بات یوں تو مجھ کو یاد آئی

قصور ظرف سمجھوں یا شعور لذت اندوزی

ترے لطف و کرم میں تشنگی ہی تشنگی پائی

نہ چھوڑا دامن ہوش و خرد دل نے محبت میں

سزائے دل حصار آگہی کی قید تنہائی

— حفیظ ہوشیارپوری