مکمل شاعری
اب کوئی آرزو نہیں ذوق پیام کے سوا
اب کوئی جستجو نہیں شوق سلام کے سوا
خواہش آرزو سہی حاصل زندگی مگر
حاصل آرزو ہے کیا سوز مدام کے سوا
تیری نگاہ مست سے مجھ پہ یہ راز کھل گیا
اور بھی گردشیں ہیں کچھ گردش جام کے سوا
رنگ بہار پر نہ بھول بوئے چمن سے در گذر
یہ بھی ہیں خوش نما فریب دانہ و دام کے سوا
کوئی شریک غم نہیں اب تری یاد کے بغیر
کوئی انیس دل نہیں اب ترے نام کے سوا
آہ کوئی نہ کر سکا چارۂ تلخئ فراق
نالۂ صبح کے بغیر گریۂ شام کے سوا
مر کے حیات جاوداں عشق کو مل گئی حفیظؔ
جی کے ہوس کو کیا ملا مرگ دوام کے سوا
— حفیظ ہوشیارپوری