مکمل شاعری

راہبر تم کو بنایا ہمیں معلوم نہ تھا

راہرو راہ بھٹک جاتے ہیں رہبر بن کے

موت کی نیند کے ماتوں پہ نہ کیوں رشک آئے

جاگنا ہے انہیں ہنگامۂ محشر بن کے

آہ یہ عقدۂ غم بزم طرب میں بھی حفیظؔ

بارہا آنکھ چھلک جاتی ہے ساغر بن کے

اس زیاں خانے میں اک قطرے پہ کیا کیا گزری

کبھی آنسو کبھی شبنم کبھی گوہر بن کے

یاد پھر آ گئیں بھولی ہوئی باتیں کیا کیا

پھر ملاقات ہوئی ایسے مقدر بن کے

وہ نہیں موت سہی موت نہیں نیند سہی

کوئی آ جائے شب غم کا مقدر بن کے

غم آفاق ہے رسوا غم دلبر بن کے

تہمت عشق لگی ہم پہ سخن ور بن کے

— حفیظ ہوشیارپوری