مکمل شاعری

ہر نقش ہے آئینۂ نیرنگ تماشا

دنیا ہے کہ حاصل مری حیراں نظری کا

بے واسطۂ عشق بھی رنگ رخ پرویز

عنوان ہے فرہاد کی خونیں جگری کا

کب ملتی ہے یہ دولت بیدار کسی کو

اور میں ہوں کہ رونا ہے اسی دیدہ وری کا

آخر ترے در پہ مجھے لے آئی محبت

دیکھا نہ گیا حال مری در بدری کا

توفیق رفاقت نہیں ان کو سر منزل

رستے میں جنہیں پاس رہا ہم سفری کا

اب خانقہ و مدرسہ و مے کدہ ہیں ایک

اک سلسلہ ہے قافلۂ بے خبری کا

دل میں ہو فقط تم ہی تم آنکھوں پہ نہ جاؤ

آنکھوں کو تو ہے روگ پریشاں نظری کا

اب فرش سے تا عرش زبوں حال ہے فطرت

اک معرکہ در پیش ہے عزم بشری کا

نرگس پہ تو الزام لگا بے بصری کا

ارباب گلستاں پہ نہیں کم نظری کا

بے پیرویٔ میرؔ حفیظؔ اپنی روش ہے

ہم پر کوئی الزام نہیں کم ہنری کا

— حفیظ ہوشیارپوری