مکمل شاعری

آج انہیں کچھ اس طرح جی کھول کر دیکھا کئے

ایک ہی لمحے میں جیسے عمر بھر دیکھا کئے

دل اگر بیتاب ہے دل کا مقدر ہے یہی

جس قدر تھی ہم کو توفیق نظر دیکھا کئے

حسن کو دیکھا ہے میں نے حسن کی خاطر حفیظؔ

ورنہ سب اپنا ہی معیار نظر دیکھا کئے

ناشناس غم فقط داد ہنر دیتے رہے

ہم متاع غم کو رسوائے ہنر دیکھا کئے

خود فروشانہ ادا تھی میری صورت دیکھنا

اپنے ہی جلوے بہ انداز دگر دیکھا کئے

دیکھنے کا اب یہ عالم ہے کوئی ہو یا نہ ہو

ہم جدھر دیکھا کئے پہروں ادھر دیکھا کئے

— حفیظ ہوشیارپوری