مکمل شاعری
امن تھا پیار تھا محبت تھا
رنگ تھا نور تھا نوا تھا فراق
ہم سے رنج و الم کے ماروں کو
کس محبت سے دیکھتا تھا فراق
دور وہ کب ہوا نگاہوں سے
دھڑکنوں میں بسا ہوا ہے فراق
عشق انسانیت سے تھا اس کو
ہر تعصب سے ماورا تھا فراق
فاصلے نفرتوں کے مٹ جائیں
پیار ہی پیار سوچتا تھا فراق
شام غم کے سلگتے صحرا میں
اک امنڈتی ہوئی گھٹا تھا فراق
کم پرانا بہت نیا تھا فراق
اک عجب رمز آشنا تھا فراق
— حبیب جالب