مکمل شاعری

کبھی تو مہرباں ہو کر بلا لیں

یہ مہوش ہم فقیروں کی دعا لیں

بہت روئے زمانے کے لیے ہم

ذرا اپنے لیے آنسو بہا لیں

نہ جانے پھر یہ رت آئے نہ آئے

جواں پھولوں کی کچھ خوشبو چرا لیں

ہم ان کو بھولنے والے نہیں ہیں

سمجھتے ہیں غم دوراں کی چالیں

نکلنے کو ہے وہ مہتاب گھر سے

ستاروں سے کہو نظریں جھکا لیں

زمانہ تو یوں ہی روٹھا رہے گا

چلو جالبؔ انہیں چل کر منا لیں

ہم اپنے راستے پر چل رہے ہیں

جناب شیخ اپنا راستہ لیں

ہماری بھی سنبھل جائے گی حالت

وہ پہلے اپنی زلفیں تو سنبھالیں

— حبیب جالب