مکمل شاعری

وقت کے تیر تو سینے پہ سنبھالے ہم نے

اور جو نیل پڑے ہیں تری گفتار سے ہیں

روح سے چھیلے ہوئے جسم جہاں بکتے ہیں

ہم کو بھی بیچ دے ہم بھی اسی بازار سے ہیں

پیڑ کے پتوں میں ہلچل ہے خبردار سے ہیں

شام سے تیز ہوا چلنے کے آثار سے ہیں

جب سے وہ اہل سیاست میں ہوئے ہیں شامل

کچھ عدو کے ہیں تو کچھ میرے طرف دار سے ہیں

ناخدا دیکھ رہا ہے کہ میں گرداب میں ہوں

اور جو پل پہ کھڑے لوگ ہیں اخبار سے ہیں

کل تواریخ میں دفنائے گئے تھے جو لوگ

ان کے سائے ابھی دروازوں پہ بیدار سے ہیں

چڑھتے سیلاب میں ساحل نے تو منہ ڈھانپ لیا

لوگ پانی کا کفن لینے کو تیار سے ہیں

— گلزار