مکمل شاعری

ذکر آئے تو مرے لب سے دعائیں نکلیں

شمع جلتی ہے تو لازم ہے شعاعیں نکلیں

وقت کی ضرب سے کٹ جاتے ہیں سب کے سینے

چاند کا چھلکا اتر جائے تو قاشیں نکلیں

غار کے منہ پہ رکھا رہنے دو سنگ خورشید

غار میں ہاتھ نہ ڈالو کہیں راتیں نکلیں

چند امیدیں نچوڑی تھیں تو آہیں ٹپکیں

دل کو پگھلائیں تو ہو سکتا ہے سانسیں نکلیں

دفن ہو جائیں کہ زرخیز زمیں لگتی ہے

کل اسی مٹی سے شاید مری شاخیں نکلیں

— گلزار